fondo
fondo
Kutiy  Kutiy

Wiqsayakunamanta amachakuna hampi

Wiqsayakunamanta amachakuna hampi sapa punchaw ukyana hormonayuq hampim, wiqsayakuyta amachaq chaynallataq huk allinkunatapas qhalikaypaq quq. Wiqsayakunamanta amachakuna hampi amachasqam, mana ancha chaninniyuqmi chaynallataq allin ruraqmi sapa punchaw pachallanpivisu ukyaptikiqa.

Hampi mullupa hormonankunaqa amachasqallatam runtunchakuypa puririyninta sayachin. Mana runtunchakuy kaqtinqa, manam ima runtunchakuypas kanqachu yuma yaku misk'ichinanpaq, chayraykum wiqsayakuy kayqa mana rikhurimunchu. Chaymantapas, hormonakunaqa wawa wayaqa k'utuyki p'itanta aswan k'iti-k'ititam ruran, yuma yaku runtunchakunaman haykunanta hark'aspa, ima manchana qhawapaq hina imatapas mana haykuchiq.

Yuyariy, wiqsayakuykunata hark’anapaqqa anticonceptiva pastillaqa ancha allimmi, ichaqa manam unquykuna qatichinakunamantachu (ITS) amachasunki

Kay qillqapi tariunki:

  • Allin ruray
  • Purichina ñan
  • Maypi rantina
  • Beneficiokuna
  • Qhipa unquykuna
  • Sapa kutilla tapukuykuna

Allin ruray

Allintapuni ukyaptikiqa, mana wiqsayakunapaq amachakuna hampi 99 tanteo allin ruraqmi. Ichaqa, manam pipas pantayniyuqchu chaynallataq amachakuna hampi ukyay qunqayqa ancha facil-llam, chayraykum chiqap kaqpiqa 91 tanteo allin ruraqlla. Kayqa niyta munan: 100 runakunamanta 9 runakuna hinalla mana wiqsayakuypaq amachakuna hampi, sapa wata wiqsayakuy qhipaqaku.

Mana wiqsayakuypaq amachana hampi aswan allintapuni ukyaptikiqa, sapa p'unchaw ukyaytapas chaynallataq musuq p'atu cajatapas pachallanpi qallayaytapas yuyarispa, aswan allintam ruranqa. Amachana Hampi sapa kutilla allin ukyasqaykita chiqanchaspaykipas, huk pisi atiy kachkanmi wiqsayakunaykipaq, chayraykum ancha allin sapa yuquyniyuq kaspayki kunduńwan kuska hap'iyniki.

Mana wiqsayakunapaq amachakuna hampi mana allin ruranampaq aswan hatun imaraqkuqa sapa p'unchaw mana ukyaymi. Aqtuy utaq 48 horamanta aswan unay q'icha unquyniyuq kay hina huk kaqkunapas, wiqsayakuy ayqichinampaq amachakuna hampi mana allintapuni rurananta ruranmanmi.

Chaymantapas, kay qhaqasqa hampikuna utaq suplementokunam amachana hampi rurayninta pisiyachinman:

  • Rifampina antibiótico (huk laya antibióticokunaqa manam amachakuna hampi pisi allin ruraqman tukuchinchu)
  • Griseofulvina anti-hongos hampi (huk anti-hongos hampikunaqa manam amachakuna hampi pisi allin ruraqman tukuchinchu)
  • VIH unquypaq wakin hampikuna
  • Wakin anti-convulsivo hampikuna (k'uku unquy utaq khatatay amachanapaq), wakin kutipiqa trastorno bipolar hina unquykunata hampinapaqpas hap'isqallataq

Amachakuna hampita ukyachkaspayki kay hampikunata ukyaptikiqa, kunduńkunata yanapawaq hina hap'iy. Kay hampikunata unay pacha ukyanayki kaqtinqa, mana wiqsayakunapaq wakinta akllakuy.

Purichina ñan

Sapa p'unchaw huk amachakuna hampita ukyaspaykiqa, wiqsayakuymanta amachasqam kanki. Manam sapa p'unchaw kikin horapipunichu ukyanayki, ichaqa rurayqa allin yuyaychaymi sapa p'unchaw ukyayta yachakunaykipaq. Alarmata, yuyarichikkunata utaq ima aplicaciontatapas hap'iwaqmi p'unchawniykikunawan kuska purinaykipaq.Aswan achka mana wiqsayakunapaq amachakuna hampi mullukunaqa 28 utaq 21 hampi mulluyuq p'atachakunapim hamun.

28 p'unchawniyuq (días) p'atachakunayuq kaspaykiqa:

Sapa p'unchaw 1 amachakuna hampita ukyay 28 p'unchaw qatiqlla (tawa simana) pacha, chaynallataq 29 p'unchawpi musuq p'atachata qallariy. 28 p'unchaw p'atachapa qhipa kaq amachakuna hampikunaqa manam hormonayuqchu. Kay amachakuna hampikunataqa "yuyarichikuna" utaq "placebo" nisqam, sapa p'unchaw amachakuna hampi ukyayta yuyarisunaykipaq chaynallataq qatiq p'atachata pachallanpi qallarinaykipaq yanapasqaykirayku.

Mana hormonayuq (yuyarichikuna) hampi mullukuna ukyanayki p'unchawkunaqa marcaman hinam t'ikrakun. Aswan achka p'atachakunaqa 7 p'unchawpaq mana hormonayuq hampi mulluyuqmi, ichaqa pisi p'unchawllapas kanmanmi. Kay hampi mullukunaqa hierroyuq utaq huk suplementoyuq kanmanmi. Yuyarichikuna hampi mulluta ukyasqayki p'unchawkunapim killa unquyniyki uraykamun. Yuyarichikuna (utaq mana hormonayuq) hampi mullukunata mana ukyaspaykipas, wiqsayuq kaymanta amachasqam kanki, qatiq p'atachayki pachallanpi qallariyta yuyariylla.

21 p'unchawniyuq (días) p'atachakunayuq kaspaykiqa:

Sapa p'unchaw 1 amachakuna hampita ukyay 21 p'unchaw qatiqlla (kimsa simana) pacha. Chaymanta qhipaman qanchis p'unchaw pacha (tawa kaq simanapi) mana ima amachakuna hampitapas ukyaychu. Tawa kaq simanapi, amachakuna hampikunata mana ukyachkaptiykim, killa unquyniyki uraykamunqa. Ancha allinmi 21 p'unchaw p'atachapi hamuq llapan amachakuna hampikunata ukyanayki, kay p'atachakuna mana yuyarichikuna (mana hormonayuq) amachakuna hampi kasqanrayku. Hormonayuq amachakuna hampikunaqa wiqsayakuy kaymanta amachasunkim, amachakuna hampi mana ukyasqayki simanapi yuquyniyuq kaspaykipas. Qanchis p'unchaw amachakuna hampi mana ukyasqayki qhipaman musuq p'atachata qallariy, 29 p'unchawpi.

¿Hayk'aptaq mana wiqsayakunapaq amachakuna hampi ukyayta qallarinayki?

Mana wiqsayakunapaq amachakuna hampi tarisqayki pachallampim ukyayta qallariwaq, ima p'unchawpipas chaynallataq killa unquyniyki pacha chawpimpi ima pachapipas. Ichaqa, manam sapa kutichu kaqlla pacha amachasqa kanki. Aamachakuna Hampi wiqsayakuymanta amachasunayki pachaqa ukyay qallarisqayki pachamantam t'ikrakun. Yaqapaschá yanapawaq mana wiqsayakuy ñanta (kunduń hina) hap'inayki kanqa ñawpaq 7 p'unchawkuna pacha.

  • Killa unquyniyki uraykamusqan qhipa 5 p'unchaw ukhupi chachasqa (combinada) amachakuna hampi ukyayta qallariptikiqa, utqayllam wiqsayakuymanta amachasqa kanki.
  • Huk pachakunapi chachasqa amachakuna hampi ukyayta qallariptikiqa, ukyay qallarisqaykimanta 7 p'unchaw qhipamanñam amachayta tarinki. Hampi mullu ukyasqayki ñawpaq simanapi yuquyniyuq kaspaykiqa, kunduń hina huk mana wiqsayakunapaq ñanta hap'iy.

Warmikunapa hanpikamayuqninwan rimariy mayqan pacha amachakuna hampi ukyay qallarinaykipaq aswan allin kasqanmanta.

Maypi rantina

Mana wiqsayakunapaq amachakuna hampi farmaciakunapi, privado klinikakunapi, hampina wasikunapi utaq internetllanta tariwaqmi. Rantinaykipaqqa manam hanpikamayuq qillqanta munankichu, ichaqa warmikunapa hanpikamayuqninwan rimariy aswan allin yuyaychaymi, kurkuykiman chaynallataq munasqaykiman aswan allin tupaq amachakuna hampi layata qillqasunaspa qusunaykipaq.

Chaninqa S/.7.50 nisqamanta S/.100 nisqakamam t'ikrakunman laboratorio chaynallataq fórrmulanta qhawarispa. Qullqiyki mana kaqtinqa, llapa suyuntinpi kachkaq qhalikay wasikunaman gratislla chayana kachkan. MINSA nisqaqa chunka tawayuq mana wiqsayakunapaq ñankunatam gratislla runakunaman qun, amachakuna hampitapas yupaspa.

Beneficiokuna

Mana wiqsayakunapaq amachakuna hampi kay ayqichinapaq ancha allin ruraq ñanmi

Kamachikuykunata qatispa mana wiqsayakunapaq amachakuna hampita allintapuni ukyaptikiqa, kayqa ancha allin amachaytam wiqsayakuymanta qusunki. Sapa p'unchaw pachallanpi amachakuna hampi ukyaytapas chaynallataq musuq p'atachaykuna pachallanpi qallariyta chiqanchayllam ruranayki. Llapallan ruranaqa chayllam. Ichaqa, amachakuna hampi ukyayta qunqaptikiqa, manam allintapuni ruranqachu.

Wawa mana paqarinanpak hampi mulluqa qhalikaypaq allinkunatam qun

Yanqa ruraykunaqa manam sapa kutichu millay kaqlla. Mana wiqsayakunapaq chaynallataq wiqsayakuy ayqichinampaq aswanqa, mana wiqsayakunapaq amachakuna hampi huk ruraykunapaqpas hap'ichikunmanmi, achka allin kayniyuq kasqanrayku. Ahinataq, killa unquy nanaykunatam (cólicos) pisiyachin, killa unquyniykita aswan pisi yawarllata ruran chaynallataq hawapi wiqsayuq kay (embarazo ectópico) atiyta aswan pisita ruran.

Amachakuna hampiqa kay qhaqasqakunatapas pisiyachinapaq utaq amachanapaq yanapanmanmi:

  • Acné nisqa
  • Tullukuna p'akichikuq tukupuy
  • Ñuñuykipi utaq runtuchayniykipi (ovarios) kistekuna
  • Endometrio kankir (wawa wayaqaykipaq ukhu qaran) chaynallataq runtuchaykuna kankir (cáncer de ovarios)
  • Runtuchayniykipi, k'utu purina ñankunapi chaynallataq wawa wayaqapi sinchi unquykuna haykuy
  • Hierro pisiyniyuq kay (anemia unquy)
  • Manaraq killa unquy hamushaqtiynin unquy

Wiqsayakunamanta amachakuna hampi mullpunakuna killa unquyniykiwan yanapasunkimanmi

Achka runakunam wiqsayakunamanta amachakuna hampi mullpunakunata munanku periodonkunata aswan p'atachasqata chaynallataq facil-lla yachayta atinaman tukuchisqanrayku. Amachakuna hampi hormonankunapas killa unquy cólicoykikuna aliviayta chaynallataq periodoykikuna aswan pisi yawarlla kanantam yanapanman.

Chaynallataqmi amachakuna hampi hap'iwaq killa unquyniyki uraykamunanta hawka kaypi ayqichinaykipaq, kayqa ancha allinmi sapanchasqa p'unchawpi periodoyki mana munaqkunapaq utaq sapa killa unquy mana munaqkunapaq.

Wiqsayakunamanta amachakuna hampi ukyayta saqirpartikiqa, utqayllam wiqsayuq qhipakuwaq.

Achka amachakuna hampi ukyaq runakunam wawayuq kayta munanku, ichaqa munasqa pacha chayramuptillan. Mana wiqsayakunapaq amachakuna hampi huk allin kayninqa runakuna saqirparisqallankawan utqaylla wiqsayuq qhipakuy atisqankumi.

Mana wiqsayakunapaq amachakuna hampiqa ancha práctico-llam

Mana wiqsayakunapaq amachakuna hampi ukyayqa facil-llam, ichaqa sapa p'unchaw ukyayta yuyaykuymi ancha sasa kanman. Allin kaqmanta rimarsikuyqa, amachakuna hampi p'atachakunaqa huch'uyllam, ch'allkillapa (celular) sayayninniyuq jinalla, chaymi maymanpas apayta atinki.

Amachakuna hampi yuquychkaspa mana hap'ina mana wiqsayakunapaq ñanmi, chaymi yuquy kawsaykiwan mana chaqrukunchu. Amachakuna hampi allintapuni ukyaptikiqa, t'ukpachasqa amachaytam wiqsayakuymanta tarinki tukuy p'unchaw, sapa p'unchaw. Achka runakunam ninku amachakuna hampi ukyayqa yuquy kawsayninkuta aswan allinman tukuchisqanta, yuquy kawsayta mana sayachinachu kasqanrayku nitaq wiqsayakuna qhipakuy atiyllamantapas llakikunachu kasqanrayku.

Qhipa unquykuna

Sapa p'unchawmi mana wiqsayakunapaq amachakuna hampita ukyanayki.

Ancha allinmi sapa p'unchaw mana wiqsayakuna amachakuna hampita ukyanayki, mana chayqa, manachá wiqsayakuy kaymanta amachasqachu kanki. Ancha ocupasqa kawsayniyuq kaspayki chaynallataq sapa p'unchaw amachakuna hampita ukyay qunqayta atini nispa yuyaptikiqa, mana wiqsayakunapa huk ñankunata qhawariy.

Mana allin yanqa qhipa unquykuna kanmanmi.

Llapan hampikuna hinam, mana wiqsayakuna amachakuna hampita yanqa ruraykunata paqarichinman. Ichaqa, aswan achka kaqkunam iskay utaq kimsa killa qhipaman chinkapuyta yachan. Achka runakunam ima sasachakuyniyuqpas mana wiqsayakuna amchakuna hampita ukyanku.

Aswan riqsisqa yanqa ruraykunaqa kaykunam: killa unquy chawpipi yawar lloqsimuy utaq t'iqpay, ñuñukunapi nanay sintiy, aqtunayay utaq uma nanaykuna. Ichaqa, manam llapan amachakuna hampi ukyaq runakunachu kaykunayuq kanku, rikurimuqtintaqmi, comunllata chinkapunku.

Mana wiqsayakuna ñankunaqa manam nanayta utaq mana allin sentikuyta paqarichisunaykichu. Allin kaqmanta rimarsikuyqa, achka laya wawa mana paqarinanpak ñankunam kachkan, chaymi huk akllanakunayuq kanki. 3 killa pacha mana wiqsayakunapaq amachakuna hampita ukyasqayki qhipaman yanqa ruraykuna sapa kutilla sasachasuptikiqa, warmikunapa hanpikamayuqninwan (ginecólogo) rimariy huk marca hampi mulluta utaq huk mana wiqsayakunapaq ñanta maskhanaykipaq. Imaymana kachun, ama huk ñanta hap'iyta qallarinayki manaraq kaqtin mana wiqsayakuna hampita ukyayta saqiychu, mana chayqa, manam wiqsayakuymanta amachasqachu kanki.

Maynin pisi kutikunallapim sinchi unquy atiykuna rikuriynin kanman.

Wiqsayakuna amachakuna hampi sinchi sasachakuykuna paqarichinayinqa ancha pisi kutillam. “Hormonasniyuq anticonceptivo nisqa hampi metodokuna apaykachaqkunaqa astawanmi hakákuq unquykunata hap’iykachikunmanku”

Qhipa unquykunamanta chaynallataq chikiyuq kaykunamanta aswan willakuykunapaqqa, warmikunapa hanpikamayuqninwan (ginecólogo) rimariy utaq amachakuna hampi p'atachapi hamuq qillqatam ñawinchay.


Kay huk metodokunata qhawariy



AOE Sasa pacha simiwan anticonceptivo

AOE Sasa pacha simiwan anticonceptivo

AOE Sasa pacha simiwan anticonceptivo nisqaqa aswan riqsisqam "qhipan p'unchaw ...

Kay qillqata ñawiriy

Mitu método

Mitu método

Métodopa resumenin Fertilidad qhawariy nisqapas sutichakunmi, hinaspa ovulaciónta qhawaspa, fértil p’unchawniykikunata qatipaspa ...

Kay qillqata ñawiriy

Vasectomía nisqa

Vasectomía nisqa

Vasectomía nisqaqa huk wiñaypaq chaynallataq mana yapa cutichiy atikuy método anticonceptivom, kayqa huk ...

Kay qillqata ñawiriy